Friburger Mundartgruppe

D Friburger Mundartgruppe (Freiburger Mundartgruppe e.V. oder au Theater der guten Laune) isch e Laievolkstheatergruppe vu Friburg, wu alljohr ei Stuck uf Alemannisch uffiere. Di maischte Vorstellige finde in dr May-Bellinghausen-Halle im Friburger Stadtdail Hasle statt, s git aber au als Uffierige in andere Stadtdail in Friburg oder au in verschidene Ortschafte im Breisgau un driber nus.

Gschicht

D Schauspieleri Elfriede Dierkes

De Vater vu de Elfriede Dierkes geb. Bartosch (1920-2013), dr Wilhelm Bartosch, het zämme mit em Désiré Lutz anne 1924 s Laientheater Elsässische Theater im Breisgau grindet, wu noch em Zweete Wältkrieg als „Alemannische Heimatbühne Freiburg i. Br“ nei grindet wore isch un sit 1962 „Alemannische Bühne Freiburg e.V.“ haißt. D Elfriede Dierkes het scho ab 1932 in sälem Dialekttheater als Schauspileri mitgmacht un au ab 1950 wider bis 1954, wo si Mueter wore isch.

Grindung vu de Freiburger Mundartgruppe

D Elfriede Dierkes het 1958 schließlige aige Ensemble grindet, d Friburger Mundartgruppe. Entstande isch die Gruppe , wu de 1.Freiburger Handharmonika und Akkordeonclub in sällem Johr s 30. Jubiläum gfiirt het un zue dem Aaloss e Theaterstuck het solle ufgfiert wäre. D Elfriede Dierkes het des Laiethater langi Johr glaitet, unterstitzt vu ihrem Maa, em Hans Dierckes, wu anne 1989 gstorbe isch. D Dierkes het in de Friburger Mundartgruppe no bis zum Johr 2000 mitgspielt un het si bis anne 2005 glaitet. Am 29. März 2013 isch d Elfriede Dierkes im Alter vu 92 Johr gstorbe.

Uffierige

D Stuck, wu d Friburger Mundartgruppe uffiert, sin luschtigi Kummedine, vilmol alemannischi Ibersetzige vu andre Stuck. Charakteristisch isch, dass alli Schauspiler in ihrem aigene alemannische Dialekt schwätze. Brobe duet d Mundartgruppe in dr May-Bellinghausen-Halle z Hasle, wu si au di maischte Uffierige hän. Jedes Stick wird uugfähr 15 mol vum Oktober bis zu em April ufgführt. In de Mundartgruppe hän sich uugfähr 25 Lit im Alter vu 21 bis 84 Johr gfunde, wu uf un hinter de Bihni wirke. D Requisite un d Kulisse werre in de May-Bellinghausen-Halle ufbhalte.

Regisseure

D Elfriede Dierkes het au langi Johr als Regisseuri d Stuck inszeniert. In dr Spilzitte 2003/04 bis 2006/07 un au 2009/10 sin d Stuck inszeniert wore vum Benito Gutmacher. 2007/08 un 2008/09 het d Tina Tritschler Regie gfiert, wu 1997 als Schauspileri in d Mundartgruppe kumme isch. De Olaf Creutzburg inzeniert ab dr Saison 2010/2011 bis hitt de Stückli.